Образовательно-развивающий сайт

“ШАЯН ТВ” балалар каналы IV нче “Сэйлэн-2022” татар җырын башкаручы балалар телевизион фестивален үткәрү турында игълан итте

angel — Wed, 02 Mar 2022 11:26:26 GMT

"Шаян ТВ" каналы татар җырын башкаручыларның "Сәйлән" IV Балалар телевизион фестивален үткәрү турында игълан итте. Фестиваль 2022 елның 17 гыйнварыннан 2022 елның 12 ноябренә кадәр үткәрелә.

Фестивальдә Татарстан Республикасында һәм Россия Федерациясенең башка субъектларында яшәүче 6 яшьтән 13 яшькә кадәрге (шул исәптән) балалар катнаша ала.

Фестивальдә татар телендәге түбәндәге жанрдагы җырлар башкарылырга тиеш:

- Татар халык җыры;

- Ретро җыр;

- Альтернатив музыка (джаз, рэп, рок, фолк һ. б.);

- Балалар җыры;

«Сәйлән» балалар эстрада конкурсы "Шаян ТВ" каналында дүрт ел элек старт алды. Ул вакытта 6 яшьтән алып 15 яшькә кадәр яшь башкаручылардан меңгә якын гариза килгән. Барлык балалар да катнаша алган, һәр гариза каралган, тик бердәнбер шарт — җырларны бары тик татар телендә генә башкару. Жюриның бурычы гади генә түгел — ул иң яхшыларны сайлап алырга тиеш. Тыңлауларны узып, 30 бала фестивальнең икенче этабына эләгә һәм ике ай дәвамында телеканал сайтында тамашачылар өчен онлайн-тавыш бирү үткәрелә, аның нәтиҗәләре буенча иң күп тавыш җыйган 16 конкурсант ярымфиналга үза.

Конкурс нигезләмәсе белән биредә танышырга мөмкин.

https://mon.tatarstan.ru/tat/index.htm/news/2061552.htm

Мәктәпләрдә Бөтенроссия тикшерү эшләре башланды

angel — Wed, 02 Mar 2022 11:24:12 GMT

Быел дүртенче, сигезенче сыйныф укучылары аларны гадәти режимда язачак, ә 11 нче сыйныф укучылары өчен уздырылу тәртибен мәктәп үзе хәл итәчәк. 11 нче сыйныфлар өчен тикшерү эшләрен тапшыру 1 марттан 25 мартка, калганнар өчен 15 марттан 20 майга кадәр планлаштырыла. Әлеге вакыт кысаларында һәр сыйныф һәм предмет өчен мәктәпләр үзләре билгеләячәк. Эш вариантлары һәр уку йорты өчен индивидуаль рәвештә биреләчәк. 11 нче сыйныф укучыларына тарих, биология, география, физика, химия һәм чит телләр инглиз, немец һәм француз телләре буенча эшләр башкарырга туры киләчәк. Әлеге фәннәр буенча тикшерү эшләре Бердәм дәүләт имтиханын (БДИ) тапшыру өчен предметларга эләкмәгән мәктәп укучылары өчен үткәрелә.

Дүртенче сыйныф укучылары рус, математика һәм әйләнә-тирә дөнья буенча, бишенче сыйныф укучылары-рус, математика, тарих, биология буенча тикшерү эшләрен язачак. Алтынчы һәм сигезенче сыйныф укучылары өчен рус һәм математика, ә җиденче сыйныфларда чит тел буенча эшләрне язу мәҗбүри булачак. Тагын ике фән буенча тикшерү эшләре очраклы сайлау нигезендә үткәреләчәк.

Мәгариф һәм фән өлкәсендә күзәтчелек федераль хезмәте мәгълүматлары буенча, кайбер тикшерүләрне компьютерда башкарырга мөмкин. Быел дүртенче, сигезенче сыйныф укучылары күпчелек фәннәр буенча тикшерү эшләрен тапшырганда бер дәрескә — 45 минутка сыешырга тиеш.

https://mon.tatarstan.ru/tat/index.htm/news/2061494.htm

«Апуш» татар театр студиясе кастингында 100 гә якын бала катнашты

angel — Wed, 02 Mar 2022 11:21:22 GMT

Казанның «Сәйдәш» мәдәният үзәгендә яңа «Апуш» балалар татар театр студиясенә кастинг узды. Анда Казан, Лаеш, Балтач, Арча районнарыннан 9-15 яшьлек 100 гә якын бала катнашты.

Укучылар үзләренең иҗади сәләтләрен күрсәттеләр – җырлар башкардылар, шигырьләр сөйләделәр, биеделәр, шулай ук жюри әгъзаларының биремнәрен үтәделәр. Кастингта катнашучыларны Россиянең халык артисты, «Сәйдәш» мәдәният үзәге сәнгать җитәкчесе Лима Кустабаева, театр актеры, актерлык осталыгы буенча укытучы, «Апуш» студиясе җитәкчесе, «Перспектива» гранты иясе Алия Фәйзрахманова, театр актеры Резедә Сәләхова, вокал буенча педагог Лилия Зәйнуллина, театр актеры, җырчы, музыкант Ильяс Фәйзрахманов бәяләде.

Казан Башкарма комитеты җитәкчесе урынбасары Гүзәл Сәгыйтова ТР башкаласында татар театр студияләрен ачарга кирәклеген билгеләп үтте. «Без «Апуш» балалар театр студиясе эшенә старт бирдек. Кастингта укучыларны үз эшләренең осталары сайлап алды. Бу студиянең идеясе күптән безнең күңелебездә бар иде. «Нур» һәм «Без» театр мәктәпләре белән танышканнан соң, яңа студия булдыру кирәклеге мәсьәләсе туды. Шуңа күрә мондый студияләр күбрәк булган саен, шуның кадәр яхшырак», – дип билгеләп үтте Гүзәл Сәгыйтова һәм киләчәктә шундый ук студияне Ленин исемендәге мәдәни-күңел ачу комплексында ачу планлаштырылуын җиткерде.

Кастинг нәтиҗәләре 2 нче мартта билгеле була. Аны уңышлы узган кешеләр «Апуш» татар театр студиясендә шөгыльләнәчәк. Театр актерлары сәхнә сөйләмен, актерлык осталыгын, вокал һәм башкаларны укытачаклар. Яшь артистлар педагоглар белән бергә татар телендә спектакльләр әзерлиячәк, шулай ук мастер-классларда катнашачак. Беренче спектакльне балалар 1 нче июньдә күрсәтергә ниятли.

Казан мэриясе матбугат хезмәте материаллары буенча

https://mon.tatarstan.ru/tat/index.htm/news/2061506.htm

Рөстәм Миңнеханов Татарстанның яшь галимнәре белән очрашты

angel — Wed, 09 Feb 2022 08:17:02 GMT

Бүген Татарстан Республикасы Президенты Рөстәм Миңнеханов Татарстанның яшь галимнәре белән очрашты. Очрашу Россия Фәннәр академиясе Казан фәнни үзәгенең Е.К. Завойский ис. Казан физика-техник институтында узды.

Рөстәм Миңнеханов җыелучыларны 8 февральдә билгеләп үтелә торган Россия фәне көне белән котлады. «Очрашуыбызга шатмын. Без барыбыз да аңлыйбыз: фәннән башка безнең держава шундый алдынгы була алмый. Безнең перспективалы яшь галимнәр бар. Бүген миңа яңа тикшеренүләр турында сөйләделәр. Мин инде якын арада алар нигезендә гамәлгә ашырылачак гамәли әйберләрне дә күрәм. Гомумән алганда, безнең фәнне алга таба үстерү буенча зур планнарыбыз бар», - дип ассызыклады ул.

Татарстан Республикасы Президенты билгеләп үткәнчә, бүген республикада академик фән үзәге (Академик шәһәрчек) булдыру мәсьәләсе карала. «Аңлау бар. Фәнни эчтәлек өлеше – академикларныкы, ә без инфраструктура үсешендә актив катнашырга әзер. Бездә яхшы база бар, әмма безгә куәтне җитди рәвештә арттырырга кирәк, - диде Рөстәм Миңнеханов. - Бездән шундый өметле яшь галимнәр китсә, бик үкенечле булачак. Киресенчә, безгә килергә омтылып торсыннар өчен, үзләрен уңайлы хис итсен өчен, шундый шартлар тудырырга кирәк. Бүген федераль мөмкинлекләр күп, без бу эшкә актив керешәчәкбез».

Рөстәм Миңнеханов шулай ук берничә сорауга җавап бирде. Шулардан Томск шәһәре белән синтетик биология һәм фармакология буенча яңа консорциум төзү турында тәкъдиме булды. ТР Президенты билгеләп үткәнчә, төбәкләр арасында фәнни элемтәләрне ныгыту бик зур әһәмияткә ия. «Бер төбәк периметрында ябылып калырга ярамый. Без һәрвакыт партнерлар эзләргә тырышабыз, һәм бу эшкә бик теләп керешәчәкбез», - диде ул.

Казан дәүләт аграр университеты белгеченнән авыл хуҗалыгы машиналарын эксплуатацияләү буенча мәгълүматлар базасын булдыру тәкъдиме килде. Рөстәм Миңнеханов билгеләп үткәнчә, мондый платформа эшләү техниканы нәтиҗәлерәк кулланырга мөмкинлек бирәчәк. "АСКда техниканың сезонлы кулланылуы сер түгел. Матди-техник өлешкә чыгымнар зур, ә комбайн ике ай эшли. Әгәр безнең мәгълүматлар базасы тулы булса, без авыл хуҗалыгы машиналарын эксплуатацияләүнең нәтиҗәлелеген арттырачакбыз һәм хезмәт итү вакытын да арттырачакбыз», - диде ТР Президенты.

Яшьләр арасында фәнне популярлаштыру турында да сөйләштеләр, аерым алганда, республика лагерьларында даими фәнни сменалар хисабына. Татарстан Президенты бу инициативаны хуплады: «Бу эшкә безнең студентларны, волонтерларны җәлеп итәргә кирәк. Минемчә, уртак сменалар, форумнар оештыру, безнең югары уку йортларының потенциалын актив куллану, укытучыларны җәлеп итү кызыклы булачак. Без бу юнәлешне тулысынча хуплыйбыз».

Шулай ук очрашу кысаларында фәнни эшләнмәләрне җитештерүгә кертү һәм телләрне өйрәнү өчен яңа инструментлар булдыру турында да сөйләштеләр.

ТР Президенты матбугат хезмәте материаллары буенча

https://mon.tatarstan.ru/tat/index.htm/news/2054951.htm

Фәрит Мөхәммәтшин республика галимнәрен Россия фәне көне белән котлады

angel — Tue, 08 Feb 2022 13:48:42 GMT

Бүген, Россия фәне көнендә, Татарстан Фәннәр академиясендә әлеге вакыйгага багышланган тантаналы җыелыш узды. Республика галимнәрен һөнәри бәйрәмнәре белән Дәүләт Советы Рәисе Фәрит Мөхәммәтшин котлады. Шулай ук Фәннәр академиясенең гомуми җыелышы кысаларында Россия Президенты тарафыннан Фән һәм технологияләр елы дип игълан ителгән узган елга нәтиҗәләр ясалды.

“Безнең фән өлкәсендә горурланырлык уңышларыбыз бар, - дип басым ясады республика паралменты башлыгы, фәнни бергәлеккә мөрәҗәгать итеп, - безнең тарихчыларның, культурологларның, лингвистларның, физикларның, химикларның, биологларның һәм экологларның, медикларның исемнәре бөтен дөньяга билгеле. Алар – безнең яшьләребез өчен үрнәк булган, гражданнар арасында фәнне таратучы "алтын фондыбыз".

Фәрит Мөхәммәтшин фикеренчә, Татарстан Республикасы Фән академиясенең уникаль социомәдәни проектларны эшләтеп җибәрү буенча тәҗрибәсе кызыклы. «Матди һәм рухи культураның күп төрлелеген өйрәнү, тарихи-археологик тикшеренүләр, гамәли нефть химиясе тикшеренүләре Татарстан фәненең визит карточкасына әйләнде, алар белән башка төбәкләрдә дә кызыксыналар, - диде ул, - бюджет барлыкка китерүче нефть-газ химиясе һәм машина төзелеше кластерлары, Татарстанның энергетика һәм агросәнәгать комплекслары академик һәм югары уку йортлары белән тыгыз хезмәттәшлеккә бурычлы. Республикада фәнни-тикшеренү институтлары һәм республиканың әйдәп баручы предприятиеләре арасындагы үзара бәйләнешне саклап кала алдык. Татарстанның күптармаклы икътисадында башкача булуы мөмкин дә түгел».

Шуңа да карамастан, республика парламенты башлыгы билгеләп үткәнчә, фәнне үстерү өчен резервлар җитәрлек, Татарстанның социаль-икътисадый үсешенә әлегә фәннең өлеше аның чын потенциалына туры килми. "Бөтен юнәлешләр буенча эшне оештыру һәм планлаштыру ысулларын сыйфат ягыннан яңа дәрәҗәдә үзгәртергә, фәннең җитештерүдә һәм җәмгыять тормышында катнашуының яңа мөмкинлекләрен эзләргә, фундаменталь, гамәли тикшеренүләр һәм инновацион эшләнмәләр башкаруга академик, вуз һәм тармак фәненең бергәлегендә һәм Татарстан икътисадының өстенлекле тармакларында фәнни-мәгариф кластерларының потенциалын ачу юлыннан алга таба хәрәкәт итәргә кирәк, - дип саный Фәрит Мөхәммәтшин. Бу өлкәдә Академиянең Россия Фәннәр академиясенең Казан фәнни үзәге, республика югары уку йортлары, тармак институтлары һәм конструкторлык бюролары, сәнәгать предприятиеләре белән хезмәттәшлеген көчәйтергә кирәк».

Татарстан фундаменталь фәнгә ярдәм итүен дәвам итә: Фәннәр академиясе тормышка ашыра торган фәнни тикшеренүләрне финанслау структурасында бюджет средстволары шактый өлешне тәшкил итә. «Шул ук вакытта, барыннан да элек, фәнни идеяләрне коммерциализацияләү, инновацияләр кертү вакытын кыскарту аша бюджеттан тыш финанслауны активрак үстерергә кирәк, чөнки гамәли фәннең кыйммәте нәкъ менә оператив үзләштерүдә», - дип басым ясады Дәүләт Советы Рәисе.

Фәрит Мөхәммәтшин республика галимнәрен парламент комитетлары каршында оештырылган эксперт советлары эшендә актив катнашырга чакырды. Республикада бөтен ил белән бергә Россия Федерациясе Конституциясенә үзгәрешләр кертүгә бәйле рәвештә гамәлдәге законнарны җентекле анализлау бара. Инде кабул ителгәннәрдән тыш, йөзләгән кануннарны, меңләгән муниципаль актларны анализларга кирәк булачак. Бу яктан, сезнең абруйлы фикерегез, эксперт бәяләре бик тә кирәк. Хакимият органнарына, җәмгыятькә аналитик эшләнмәләр, модель тәкъдимнәре гомумән дә җитми ", - дип саный парламент башлыгы.

ТР Фән академиясе президенты Мәгъзүм Сәлахов узган юбилей елын (ТР Фәннәр академиясе төзелүгә 30 ел һәм ТАССР Академия үзәге оешуга 100 ел) республика галимнәре өчен уңышлы дип саный. Аерым алганда, Академия татар тел белеме һәм әдәбият белеме, тарих һәм сәнгать белеме, археология һәм энциклопедистика, экология һәм җир асты байлыкларыннан файдалану һәм кайбер башка юнәлешләр өлкәсендә тикшеренүләрне уңышлы үстерә. Татарстан патентлар саны буенча да Идел буе федераль округы төбәкләре арасында лидер булып кала.

Республикада игълан ителгән Туган телләр һәм халык бердәмлеге елы һәм Бөтенроссия халык санын алуны уздыру Фәннәр академиясе эшенә зур йогынты ясаган. «Барлык бу вакыйгалар яңа проектларны гамәлгә ашыруда чагылыш тапты, - дип ассызыклады Мәгъзүм Сәлахов, - мәсәлән, Фәннәр академиясендә халык санын алу белән бәйле рәвештә республикадан читтә яшәүче татарларның тарихына, теленә, мәдәниятенә кагылышлы 50дән артык китап басылып чыкты; милли идентификация мәсьәләләренә кагылышлы экспедицияләр, семинарлар һәм түгәрәк өстәлләр үткәрелде». Моннан тыш, татар телен һәм әдәбиятын укыту методикасын камилләштерү эше дә дәвам итте. 8-11 сыйныфлар һәм 5-9 сыйныфлар өчен туган (татар) әдәбияты буенча дәреслекләр эшләү тәмамланды.

Татарстан галимнәренең эшләнмәләре еш кына идарә карарлары нигезенә салына. Аерым алганда, Гаилә һәм демография үзәгенең фәнни-тикшеренү эшләре мәгълүматларыннан чыгып, 2023-2026 елларга Татарстан Республикасында ир-атлар мәнфәгатьләрендә гамәлләр стратегиясе проекты эшләнгән.

Узган ел Татарстан галимнәре медицина мәсьәләләренә зур игътибар биргәннәр. Аерым алганда, мөхбир әгъза Альберт Ризванов һәм аның фәнни җитәкчелегендә коллектив SputnikV вакцинациясеннән соң барлыкка килә торган, озак вакытка исәпләнгән иммунитетны өйрәнгәннәр. Аларның тикшеренүләре мәгълүматлары күрсәткәнчә, SputnikV вакцинасы беренче дозадан соң ук антитәнчекләр барлыкка китерә, ә икенче доза антитәнчекләр эшләп чыгаруны арттыра.

Татарстан галимнәренең шактый казанышлары нейроэндоскопияләр өлкәсендә дә тупланган. Узган ел Альберт Суфианов җитәкчелегендә галимнәр тарафыннан нейрохирургия өчен югары технологияле электрохирургия пинцетлары уйлап табылган һәм серияле җитештерүгә җибәрелгән.

Мәгъзүм Сәлахов шулай ук фән үсеше проблемаларына да тукталды. Шуларның берсе - фән һәм җитештерүнең җитәрлек дәрәҗәдә элемтәсе булмау. "Бүген икътисадның реаль секторыннан фәнни тикшеренүләргә ихтыяҗ бик аз, – диде ул, – инновацион процессның барлык катнашучылары арасында хезмәттәшлекне оештыру актуаль бурыч булып тора".

Тагын бер проблема - кадрлар мәсьәләсе. ТР Фәннәр академиясе каршындагы Рөстәм Миңнеханов ярдәме белән ике диссертация советы ачылган. "Шул ук вакытта квалификацияле кадрлар әзерләү өчен шактый матди чыгымнар таләп итә, - диде Мәгъзүм Сәлахов, - бу фәнни журналларда мәкаләләр бастыруга да кагыла". Бүген галимнәр югары квалификацияле кадрлар өчен адреслы ярдәм күрсәтү системасын булдыру тәкъдиме белән чыктылар.

Тантаналы җыелыш дәүләт бүләкләрен тапшыру белән тәмамланды. Моннан тыш, бүген яшь галимнәргә Татарстан үсеше өчен перспективалы һәм әһәмиятле өлкәләрдә фәнни тикшеренүләр уздыру өчен грантлар һәм премияләр тапшырылды. Сертификатларны ТР Президенты ярдәмчесе Альберт Гыйльметдинов тапшырды.

ТР Дәүләт Советы матбугат хезмәте материаллары буенча

https://mon.tatarstan.ru/tat/index.htm/news/2054898.htm

10 февральдән Татарстанда «Ел укытучысы» конкурсының зона этаплары башлана

angel — Tue, 08 Feb 2022 12:50:53 GMT

«Россия Ел укытучысы» Бөтенроссия конкурсы ел саен иҗади эшләүче педагогларны ачыклау, аларга ярдәм итү һәм бүләкләү, перспективалы белем бирү идеяләрен һәм практикаларын популярлаштыру, шулай ук педагог һөнәренең уңай имиджын формалаштыру максатыннан үткәрелә.

Быел конкурс түбәндәгечә үткәрелә:

мәктәп этабы - 2021 елның 16-23 декабрь,

муниципаль этап - 2021 елның 17 гыйнварыннан 2022 елның 25 гыйнварына кадәр;

зона этабы - 2022 елның 10 февраленнән 5 мартына кадәр аерым график буенча.

Төбәк этабы 2022 елның 20-25 мартында узачак.

Конкурс ике телдә - русча һәм татарча булачак.

Конкурсның зона этабы 9 конкурс мәйданчыгында узачак: Биектау, Бөгелмә, Спас, Балык Бистәсе, Югары Ослан, Тукай, Актаныш, Тәтеш районнарында һәм Казанда.

Конкурсның төбәк этабын Казан шәһәре мәктәпләре базасында үткәрү планлаштырыла. 2022 елның 25 мартында Татарстанда «Ел укытучысы» конкурсын ябу тантанасы була, аның җиңүчесе «Россия Ел укытучысы» конкурсының йомгаклау этабында катнашачак.

https://mon.tatarstan.ru/tat/index.htm/news/2054267.htm

Татарстан Республикасы мәгариф һәм фән министры Илсур Һадиуллинның Россия фәне көне белән рәсми котлавы

angel — Tue, 08 Feb 2022 09:46:25 GMT

Хөрмәтле галимнәр, фәнни хезмәткәрләр, укытучылар, аспирантлар һәм студентлар!

Сезне чын күңелдән Россия фәне көне белән котлыйм!

Илебез һәм республикабызның үсеш һәм иминлек нигезен элек-электән дөньякүләм танылган фәнни мәктәпләр, бөек тикшеренүчеләр һәм новаторлар тәшкил итте. Россия галимнәре һәрчак тынгысыз хезмәтләре, халык мәнфәгатьләренә һәм үз һөнәрләренә тугрылыклары белән аерылып торды. Аларның казанышлары нәтиҗәсендә илебезнең байлыгы һәм көч-куәте үсә барды.

Бу матур бәйрәм даими интеллектуаль эзләнүдә булган, үз өстендә эшләү, фикерләү даирәсен киңәйтү һәм белем багажын тулыландырудан туктамаган үзенчәлекле кешеләрне берләштерә. Фән юлы – ул кешенең тормышын, уй-фикерләрен, холкын, гадәтен һәм яраткан шөгыльләрен тулысынча үзгәртә, үзенә буйсындыра торган озын дистанция.

Тарихтан билгеле булганча, Татарстан һәрвакыт илебезнең фәнни-мәгариф комплексы лидерларының берсе буларак чыгыш ясый, ә республикабыз башкаласында күп кенә бөтен дөньяга танылган фәнни мәктәпләр үз башлангычларын ала.

Дәүләтләрнең позициясе, барыннан да элек, интеллектуаль ресурсларны, алдынгы технологияләр һәм фәнни җитерештерүне билгеләгән чорда бу бик мөһим. Фән үсешенең югары дәрәҗәдә булуы икътисадның динамик үсеше, конкуренциягә сәләтлелек һәм иминлек өчен әһәмиятле шарт булып тора.

Әлеге бәйрәм көнендә Сезгә ихлас рәхмәт сүзләремне җиткерәм һәм яңа казанышлар, планнарыгызны тормышка ашыруда уңышлар телим! Сезгә һәм гаиләләрегезгә ныклы сәламәтлек, бәхет һәм иминлек юлдаш булсын!

https://mon.tatarstan.ru/tat/index.htm/news/2054669.htm

Бүген беренче сыйныф укучыларының өстәмә кышкы каникуллары башланды

angel — Mon, 07 Feb 2022 09:11:44 GMT

Бүгенге көннән, уку планы нигезендә, беренче сыйныф укучылары өчен 7 февральдән 12 февральгә кадәр өстәмә каникуллар оештырылды. Мәктәпләрдә саф һавада уртак чаралар планлаштырылган, балалар музейларга һәм театрларга, "Россия - минем тарих" тарихи паркына барачак. 7 февральдә балаларга "Оркестрның тылсымлы кыллары" проекты кысаларында Дәүләт симфоник оркестры музыкантлары мастер-класс күрсәтәчәк, "Яшьлек" балалар иҗаты үзәгендә "Чиста күк өчен рәхмәт" дип аталган кәгазь самолетлар очырту буенча шәһәр ярышлары узачак. 12 февральдә "Россия чаңгы юлы-2022" массакүләм узышы белән атна тәмамланачак.

Калган балалар укуларын дәвам итә. 4 нче февральгә булган мәгълүматларга караганда, республикада 466 мең 207 укучы һәм 31 801 укытучы көн саен иртәнге медицина фильтрын уза. Бүгенге көндә 758 укучы иртәнге фильтрны үтмәгән (1 сентябрьдән - 42 444 бала).

357 мәктәптә (03.02 - 366 мәктәптә) аерым сыйныфларда дәресләр үткәрелми. Авыруның күпләп таралуына юл куймау максатыннан 10 мәктәп: Актанышта - 2, Минзәләдә - 1, Лаешта - 4, Тукай районында - 2 һәм Тәтеш районында 1 мәктәп тулысынча карантинга ябылды.

Авыру балалар белән элемтәдә булган балаларны аерым сыйныфларга күчерү, эпидемиягә каршы иң мөһим чараларның берсе булып тора.

Ата-аналар игътибарына: әгәр балагыз авыру сәбәпле дәресләрдән вакытлыча азат ителгән икән, ул башка балалар белән аралашырга яки җәмәгать урыннарында йөрергә тиеш түгел.

Әгәр сыйныфта 20 процент бала грипп яисә ОРВИ белән авырып китсә, аларны өйләренә кайтарып җибәрергә мәҗбүр булалар. Мондый сыйныфларда дистанцион укыту тулысынча сәламәт балалар өчен оештырыла.

Исегезгә төшерәбез, Татарстанга 12-17 яшьлек яшүсмерләр өчен «Спутник М» вакцинасының беренче партиясе килде. Прививка ата-аналарның язма ризалыгы белән генә үткәрелә.

https://mon.tatarstan.ru/tat/index.htm/news/2054366.htm